澳牛的太陽蛋反蛋

網上史兄寫的「澳牛的黃昏」超爆笑，但看到最後有些無奈心酸。

已經好多好多年冇去澳牛啦。嗰時仲係唔駛排隊架。

依家Mr T係唔會陪我去排隊的，而且佢又好憎好逼的地方，一張細枱坐滿晒人，佢會唔郁得，實反枱，no way~

我記得好耐以前讀大學時，放咗學間中經過佐敦會同Mr T或常春藤小姐去澳牛食個光速餐。其實當時我唔覺啲伙計催緊你，可能我遲鈍啦！記憶中佢哋仲對我好好，我話要坐卡座，伙計哥哥實俾我坐。不過可能當時我仲係青春少艾啦！如果換轉係個麻甩佬我唔敢包囉。

話說好多年前和Mr T再一次去澳牛，叫嘢食的時候，一時醒唔起我要嗰種蛋叫乜，其實我想要兩面都熟的蛋（我不嬲鐘意炒蛋，話晒係澳牛名物嘛，不過我相信當時應該係有禽流感）。

咁我求其形容俾伙記哥哥知啦：

我：唔該太陽蛋反蛋吖！

佢：（木無表情）太陽蛋冇反蛋。

我：下？！（竟然有勇氣而且天真地問）點解太陽蛋冇反蛋架？

佢：（不厭其煩地兼且無黑面）太陽蛋冇得反蛋。

我：點解。。。

Mr T：（立即中斷我）佢要荷包蛋吖！

伙記哥哥行開後，我當然繼續問Mr T點解啦，佢用神秘聲線叫我細聲啲，好多人係度=.=

我唔同意sunny side up冇得反蛋曪。呢個係一個過程，煎好一面sunny side up的蛋然後反轉佢，咁咪係反蛋囉！

重點唔係食乜蛋，我想講我咁無聊個伙記哥哥都冇XYZ我，所以我覺得啲服務態度唔差㗎。

網上有啲媽媽話佢哋大肚或者抱住BB時去排隊食澳牛，啲紋身金毛伙記係第一時間俾佢哋入去唔使排隊，而且俾靠背靚位加多張士啤櫈俾佢哋擺嘢，非常體貼架！

我一定要搵一日去下澳牛食個光速餐先。問Mr T肯唔肯陪我去，佢話唔駛排隊就得啦！

奇妙的緣份

2014年1月27日。星期一。年廿七

晚上老豆買了盆菜而且煮了好多餸，所以放工後又番去屋企食飯。

我屋企只係得老豆煮飯，煮乜都好味。而我媽咪煮就。。。唉~如果地獄廚神有分等級，她就是終極版。我記得對上一次係我十幾歲的時候（對！好多年前），她用電飯煲煮飯都可以整到啲飯唔熟囉，㩒個掣之嘛。我記憶中，阿媽未試過煮過一餐飯。

老豆好鐘意人哋讚佢煮啲餸好味。其實真係超好味，我每次都話好好味，但次次都叫佢唔好煮咁多嘢啦。

好似今晚咁，已經有個夠六人食的盆菜，老豆仲煮咗六碟餸，煲咗一大煲鮑魚花膠湯，仲煮重米，加埋盆菜送的甜品，十二個人都食唔哂，而小乖同姪仔軒軒又唔食得。你估我哋有幾多人？其實我哋只係得五。個。人。=.=

。。。

食完飯，帶埋軒軒同細佬弟婦去隔離屋玩。鄰居剛巧是我的可愛嬌滴滴朋友。

以前朋友和我每天都定時定點一起搭同一班過海巴士上班去，在同一個站下車。直到我和Mr T訂婚了離家搬去巿區為止。

在巴士上，我見證著朋友如何結識現在的老公。那男孩一幅戇直樸實模樣，每天也搭同一班巴士，有時他會坐在我朋友身旁。在一年多之後的某一天早上，那時坐在他倆後面的我聽見靦腆的他鼓起無比勇氣向我朋友打招呼，之後開展了一段巴士情緣。真的很浪漫~

之後當然順利拍拖，閃婚，生下現在已經兩歲的乖巧伶俐女兒。朋友告訴我，之前和前任拍拖了十多年也要分離，沒想到新相識這男孩幾個月就談婚論嫁。看來緣份來了誰也擋不住。

某天我朋友告訴我，她和老公買樓搬家了，細問之下，原來她搬去了我老家的大廈裡：

我：嘩！咁啱嘅？我屋企人住晌嗰座架！

朋友：我住12樓呀！

我：唔好話我知係X室呀？！

朋友：你點知架？

我：係正我屋企隔離呀。yeah!

這就是朋友和我的奇妙緣份。

全家人知道了我的朋友是新鄰居後非常高興，因為乖乖在家人回家時會興奮得吠叫，怕新鄰居討厭狗而每天去管理處投訴。而我這愛狗的新鄰居當然不會投訴乖乖啦！令屋企人放心不已。當然老豆成日送薑醋同好吃的東西賄賂下鄰居啦！

朋友抱著我的姪仔。姪仔剛學會吮手指，仲要打孖雙手塞入口，吮個不亦樂乎！

。。。

後記。嫲嫲如何分辨好男人。

嫲嫲成日說我朋友的老公係好男人。點解？

嫲嫲說每次在大堂或電梯踫面，朋友的老公總有禮貌地叫聲婆婆而且熱情地搭著嫲嫲膊頭扶實她，很窩心呢！

果然孝順尊重老人家的必然係好仔，包括我老豆，細佬，朋友老公，當然還有Mr T啦！

告一段落

上星期六去EC診所進行第十次的針灸，終於完成鼻敏感的療程。

鼻敏感源於四年前，我相信是由於工作間大樓的空氣系統甚差所至。未加入現時的工作間前，我以前的舊公司在中環的商廈內，做了多年也沒有什麼不妥。

Wiki下現時工作的大樓歷史，原來就快三十年。中央冷氣系統及洗手間去水系統我俾十個差差差。但早前竟發現環保署的測試話呢度的空氣質素居然係。優。良。囉！

我來到這工作間才有鼻敏感，買了個空氣清新機放在旁邊才好一點。以前每天由起床直至睡覺全日都會打至少20個乞嚏，全日都鼻塞，天氣冷時更嚴重，極度痛苦。

。。。

其實我想說針灸真的好神奇。五個星期共十次針灸就差不多醫好了纏擾我四年的鼻敏感，不過亦有飲中藥，雙管齊下。加上慢慢調理了我的身體，老實的EC話我不用再覆診了，如果以後有傷風先再搵佢啦。真係超超超䦕心呀！

希望馬年身體健康，心想事成啦。

團年飯。相聚

2014月1月25日。星期六。年廿五

今日好忙呀，中午先去奶奶家吃團年飯，然後晚上回家和爸媽慶祝生日，順道吃團年飯。

。。。

老爺晨咁早去花墟買串串金。依家未開，唔好以為好似枯枝咁，遲幾日開晒會好靚。

家常美味小菜，另加花膠海參螺頭湯，淨係湯渣已經一大碟，非常滋補。奶奶的幫工已學識浸發海參花膠。發花膠好易吖，不過啲海參要發四日，好勁。

。。。

下午回家去。好耐冇見小乖乖，掛死我啦。嗲乖係咁要錫錫，真係好激動，勁痴纏。

老豆堅持每逢做節一定佢請，不過今日當係慶祝老豆媽咪生日，我請。

去咗三聖邨買海鮮，去廣東名門食。今晚每間三聖邨的海鮮酒家都超爆，好彩有訂枱，不過都要等。

一向幫襯開關財記買海鮮，幾老實，貨又新鮮，店內有三隻好乖的狗狗，係鎮店之寶。老闆和店員們聲粗粗不過好好人，俾我行來行去狂影，冇嫌我阻住晒。

有清蒸鮑魚，東星斑，名物脆皮芝士龍蝦，蒜蓉蒸扇貝。

鼓椒炒蟶子，金牌咕嚕肉，薑汁芥蘭，花雕蛋白蒸蟹，白灼螺。

有可愛的姪仔，成晚冇扭計，淨係掛住笑，任人抱，是個好乖的BB。

11點才走。姪仔仲精神過我，好犀利。

公司二三事

我的工作間有個傳統或者是個不明文規定，凡是升職者都要請全公司食餅飲嘢。為食的老闆們已提醒我記得請食餅。

我的公司在大樓佔地三層樓及在附近的商廈有另一個單位，差不多有300位同事。

在這裡做事已有五年，吃過非常非常多的升職餅和散水餅。這裡很少人辭職，食散水餅多數因為同事退休或調遷。

今次升職得我一個，冇得同人share升職餅但沒有所謂啦。幾百位同事我固然並不每位都認識，但其實我相信有許多人都曾直接或間接幫助過我。

。。。

以往同事們請的多數是美心和東海堂的蛋糕，超悶。今次我決定買新加坡過江龍Twelve Cupcakes，請秘書幫忙訂購。於情人節當日向同事送上繽紛悅目的cupcakes。

其實選擇Twelve Cupcakes的原因最主要係我想食，而且將心比己，次次食美心真係食到悶，寧願多花一點心思希望讓同事食得開心啲。

。。。

有一件事令我頗為欣慰。我發現自己的人緣不錯。升職的電郵一出，許多同事、舊上司等都用email或電話恭喜我。

其實初時離開私人公司加入這裡，有許多事也不習慣，由同事的心態、效率至公司的辦公室守則、工作流程，都需要慢慢適應。慶幸的是，適應期比我想像中短。

。。。

辦公室的人際關係必然有些煩人煩事，但我常常以抽離的角度看侍它，無必要凡事放大，其實這些都是極度芝麻綠豆的小事，不值一提，加上一般同事通常唔會或者唔敢直接煩我，以我所知過去我一直遠離是非。除了上年我突然無啦啦放咗加埋有個幾月的假，我的秘書話我知勁多同事無論熟定唔熟都走去問佢我有冇事。雖然我唔知同事們係真心關心我定係八掛，嗰排我的健康情況相信係辦公室話題榜三甲之內。

。。。

得閒再寫辦公室其他的二三事。

人生所缺。知足常樂

今天下午，從老闆手上收到一封枱頭給我的密封信件。

打開一看，是一封升職信。當下有些激動，千頭萬緖在心裡一下子湧出來，止不住眼淚。

激動的不是因為升職。我也講不清原因。可能仕途如何順利也抵消不了我失去至愛的傷痛。

從前的我，簡單的二人生活，努力專注在工作上，全心拼勁，每件事情總想做好一點。但非極有野心那種，在這工作間，有它的遊戲規則，野心出位等行徑皆不會有助開拓你的仕途。

仕途上我絕對幸運，為我帶來安穩的生活，雖然我常常說這是一份辛苦工，然而在香港冇乜邊份工唔辛苦。所以我必須感恩。

但我對人生仍不知足。現在的焦點似乎不在工作上。

對於工作，我的心態是未來也不知要多少年才排隊輪到我更上一層樓，我也絕不奢望二十年後會做到大老闆，這份超超辛苦兼壓力爆燈的工絕對不適合女人，所以我絕對安於現狀。況且我有Mr T作我的強大後盾，很希望在理財方面加把勁，提早退休。現在工作間研究延長退休年齡，痴線啦，你唔好逼我做到65歲，實反枱。

到我這年紀，有愛我的家人和寵我的伴侶，有穩定的工作和安逸的生活，就會想想人生欠缺什麼。一方面告訴自己順其自然不能強求，另一方面就盡自己最大能力，至少盡了力不後悔。

知足常樂。Mr T這點比我看得開。

杭州。隨逛隨想

一到達杭州，就去了清河坊古街，兩旁有很多古舊矮樓。

這條步行街有幾百年藥業老字號胡慶余堂的店舖和博物館，它的歷史比北京同仁堂還要久。這裡是受保護文物。

很多杭州居民在這裡看症及執藥。慶余堂地方大到不得了，只是這個古色古香的歷史院子已令我們驚嘆萬分。胡慶余是杭州富裕絲綢商家，創立這藥號。我想三百多年前這裡必定風光不已。

免費供路人解渴的清熱降火決明子苦丁茶。

古街隨影。

很喜歡冬天這種大樹。

。。。

今次住Holiday Inn，房間正正常常乾淨企理。Mr T生辰那天晚上從湖濱28吃完晚飯回到酒店房間，發現有個生日蛋糕送給Mr T，有些驚喜。

很大個蛋糕，Mr T一個人吃了一半，我則太飽，吃不下。

。。。

成個旅程都覺得杭州是個很文明的城市，的士司機大多都斯文有禮，有位更似專業導遊，把西湖景點歷史等一一向我們介紹。

本來對杭州的印象很好。不過最後被那位接載我們到機場回港的不誠實的士司機破壞了。雖然只是被騙了二十多元，但我真的氣難下。

到達機場，還未check in，我忍不住依照的士發票上的杭州巿投訴熱線／用我超爛的普通話投訴那個司機濫收車資及詐騙的不法行為，嬲到我吖！

題外話：Mr T的普通話發音好標準架，話晒佢以前學咗3年普通話，但係佢就點都唔肯幫我打去熱線投訴，攪到我成個低能仔咁同熱線職員雞同鴨講：禾丘頭su娜個pan禾請的taxi司G！

我其實是說：（請以普通話說出）我要投訴那個騙我錢的的士司機。

我一路同職員講電話，我見到Mr T係度狂笑囉=.=

杭州。西湖

什麼也不用說，看圖片吧。

杭州。美食

三日兩夜杭州之旅，重點在吃吃吃和西湖。

在吃方面，出發前google一番，看看有什麼受歡迎的店子。最後我準備了一張有十多間餐廳的清單，在旅途中隨意挑選。

。。。

1月17日晚上

玉玲瓏 （上城區綠陽路1號，中國美術學院斜對面）

。。。

1月18日中午

西湖國賓館紫䉠廳（西湖區楊公堤18號西湖國賓館8號樓嘉樂苑）

在西湖蘇堤附近的國賓館，門口有塊巨石，上有江澤民的提字，好有氣勢。大門有公安站崗，說出去吃飯，公安才讓出租車入內。

坐在窗邊的枱子，窗外風景很怡人。叫了幾樣傳統菜。

一向對西湖醋魚存疑，很怕腥及多骨的魚，但一場來到，必定要吃一次，所謂未食過又點知好唔好呢。

結果這半條用草魚煮成的西湖醋魚令人非常難忘，是我們當日午餐最愛的一道菜，連最最討厭魚骨的Mr T也說這半條魚是他的至愛。很久以前看飲食節目，西湖醋魚是浸熟的，難怪魚肉異常嫩滑。

必吃龍井蝦仁，東坡肉，非常出色。

另外一個重點菜是「舌尖上的中國」曾介紹這裡的虎跑泉水松茸炒飯。炒飯的技巧太高超了，初時以為是穤米飯，因帶有嚼勁，但試多口其實是普通米，但完全做到每粒飯粒分明，完全不黏糊，勁！

。。。

1月18日晚上

杭州Hyatt酒店湖濱28中菜廳

在Tripadvisor杭州餐廳排第二位的湖濱28，知道是Hyatt的中菜餐廳，決定一試。沙田Hyatt的沙田18是我們常到的餐廳，對Hyatt的中菜很有信心。

果然沒有失望。地方舒適，菜式精緻美味，尤其那燻魚，入口即溶的獅子頭和海鮮泡飯，現在仍回味中。

甜品龍眼cream brulee和酒釀芝麻湯丸很好吃。

。。。

在杭州最滿意是紫薇廳和湖濱18，相對之下玉玲瓏完全給比下去。

總括而言，在杭州吃到的這些著名菜式更令我覺得中菜真的很博大精深，令人有衝動想純粹為吃而走遍大江南北，親身體驗舌尖上的中國。