血糖餐單。最後準備(8）

由八月初開始跟營養師餐單食嘢同篤手指。呢set係驗血糖嘅架生。每星期搵兩日驗，每日篤四次，填寫血糖記錄帶返醫院俾營養師，姑娘同醫生睇。

我發現篤手指尾無咁痛。啪針嗰下要快狠準，唔好拎住部針機篤唔落手。

以下係我的午餐或晚餐，大多數係紅米飯，意粉，蒸或烚或煎的餸，幾悶下。不過依家我的血糖指數仲係有啲唔穩定，唉！

啱啱食呢個餐單的時候，體重輕咗1kg。營養師話carbohydrate唔夠，叫我要跟足份量，即係滿5湯匙的飯或1又3／4碗的意粉，加埋茶點一日要食足六餐。好多呀，好頂胃。以前我凈係食兩啖飯，狂食餸同飲湯。

兩星期後的今日又返去醫院見營養師同醫生。指數係有些超標，不過唔係咁差，三星期後再返去覆診。

上星期開始左腳水腫，早上消了，但每到下晝晚上又有明顯水腫，持續了一星期>.<飲過紅豆水同赤小豆水，唔係好覺消腫，不過好過冇啦。晚上Mr T會先幫我較熱水浸腳，之後幫我用BB油按摩雙腿，由下推上去去水腫。其實自從育嬰班嘅姑娘教咗點按摩後，一有時間Mr T就會幫我按摩四肢，爽呀！Mr T真係一個好老公（曬命中，請戴上黑超！）。

。。。

依家31w。之前趁自己行得走得仲精神奕奕的時候已經買哂BB嘢，大件嘢今個月陸續送貨，屋企的傢俬大執位，丟了一些東西，有少少未慣。工人姐姐的visa批咗啦，今個月會到。不過未執整齊啲立雜嘢同洗衫仔床上用品等，仲要加油。依家我終於知呢個大project有幾多嘢攪啦，不過當成功完成後我唸Mr T同我會有超大的成功感^^

成日驚雞蛋仔提早出爐，於是又開始執定威記用的走佬袋，執咗一半，已經鬼死咁多嘢，因為公立乜都要自己帶。不過34w後，就算早咗仁安都會收我，咁我會拎返哂所有嘢出嚟，走佬袋淨係帶自己睡衣，雜物同雞蛋仔出院衫仔入仁安就得啦。我真係想像唔到如果係威記自己生會點，所以每日我都同雞蛋仔講要乖乖等到10月22日等Dr. L幫我接生。

。。。

雞蛋仔成長記錄：

30w2d: 1857g (4lb2oz)

我依家重咗12磅（肚圍39＂）