因為有糖尿，提早了見Dr L。
見完他後，心情通常relax啲。他會安慰你話冇事嘅，糖尿讀數都唔係好高吖，keep住餐單食，通常控制到，唔駛打胰島素針架，BB冇嘢喎，一直都係咁大隻。
雞蛋仔重3磅3安士，肚仔大咗三週半。他今日的post係倒竪䓤，背脊得住醫生，睇唔到佢個肥仔樣。
28w呢個安全島順利到達，要讚下雞蛋仔叻叻先。但我作為災難小姐，下個目標係34w，因為早過34w出世，私家醫院會唔收我，到時Dr L冇得幫我開刀，咁就要焗住去公立自己生，天啊！！！唔好要我痛20個鐘之後仲要食埋個全餐呀，千祈千祈唔好呀，我仲未有心理準備呀（尖叫中）。
Dr L摸摸我的肚說希望BB唔好咁快出嚟呀，佢都想BB足月先出世！
雞蛋仔成長記錄：
27w6d: 1455g (3lb3oz)
我身高167cm，重62.4kg，依家重咗11磅（比3星期前重咗1磅，全部肥咗係雞蛋仔度）
肚圍38.5＂
。。。
2014年8月11日。星期一
今日朝早返醫院上營養師同助產士的糖尿講座，由朝早9：30聽到12：45，內容好充實。
有20幾個媽媽出席，坐滿了課室。有個週數得10w都中，不過佢屬於大碼型，其他好似我28w到30幾週不等。我覺得自己相比起其他媽媽係屬於肥B唔肥媽型，背後睇身型唔似大肚，冇水腫，家族裡冇糖尿病史，令我成口問點解我係嗰14%患上妊娠糖尿的媽媽呀？=.=
營養師教點食一日六餐的1800kcal餐單，而助產士教如何篤手指同用血糖機，仲要係佢面前篤一次手指，成功用到部機才可落堂。由依家開始，食營養餐直到生，每星期有兩日要篤4次手指＞.＜
下星期四要帶血糖記錄單獨見營養師，助產士同醫生，如果醫生認為餐單無助控制血糖，咁有可能要打針。所以我要努力堅持呀。
買咗血糖機同配件。
部機雖然有得租，但係買多盒試紙就其實送埋部機（全新）俾你，成世保養，生完後唔駛拎返部機去還機，咁就買啦。仲有一小部份有妊娠糖尿的媽媽生完幾年後會變成二型糖尿，我想以後我都可能要睇緊啲血糖，有部機check住放心啲。
。。。
第一次篤手指嗰下真係有啲心理障礙，要衝破呢個障礙先銡得落手呀，我覺得我越來越勇敢啦。由懷孕初期一星期內抽3次共8筒血，驗糖尿抽2次血，加埋自殘篤手指，覺得自己好勁抽呀！你要知道以前的我咁大個人連打針都喊到Fi Li Fer Ler，抽血抽到哮喘發作，依家可以咁，算好勁啦！
原來為咗雞蛋仔，我可以去到好盡，包括之後要開刀，但我依家唔驚住。我睇過一個醫生媽媽的blog，佢話開刀生仔係其中一個最血淋淋的手術，醫生要係半小時內拿BB出來，根本冇時間同唔會去止血，於是一層層快速𠝹開表皮，肌肉，腹膜，最後子宮，過程中啲血係咁流。我冇嚇你呀。我唔驚，因為我知唔痛同Mr T會一路陪住我，終於可以見到雞蛋仔，開心都嚟唔切。
多謝雞蛋仔令我勇敢起來。爸爸媽媽非常期待你的來臨，記住呀，要健健康康咁到十月尾出嚟見我哋呀！
沒有留言:
張貼留言