雞蛋仔。碎碎念篇(5）

糖尿測試。。。

今朝去母嬰健康院飲糖水，做糖尿測試。沒有叫Mr T陪伴，因為要幾個鐘，費事佢等到個頭生菇。

飲糖水前後要各抽一支血。為了雞蛋仔，我要勇敢，因為成世人最怕抽血，以前試過抽抽下驚得滯引致哮喘病發。半邊身麻痺咗，好恐怖。是的，我是很蛇gwer低能的。

啱啱抽咗血同飲咗糖水。當我話俾年輕好笑容姑娘聽我試過哮喘後，佢叫我瞓係張床抽血，等我冇咁驚，抽嘅時候又好溫柔，唔係好痛，抽完又叫我瞓多陣休息下，勁好人。

糖水係要自己沖的。用隻大杯，加入一包好大包好似葡萄糖的糖粉，我用暖水沖來飲。我覺得傳說中的糖水係幾好飲的，只不過似好甜的葡萄糖水，可能今朝空肚冇飲過水，超口渴啦。不過如果係凍的糖水，我覺得係會超難飲囉。

等兩個鐘抽多次血，就走得啦。

。。。

購物記。。。

七月上了共四堂BB Care舉辦的育嬰班，上完堂，加埋細佬的連番教育，終於對BB用品有啲概念，以前連紗巾係乜都唔知，對住張水蛇春咁長的shopping list企咗係度：啲嘢乜嚟架？

上完堂後順便在班房旁的店子裡掃貨，我覺得好多嘢比百貨公司同商場內BB用品店便宜好多，例如我係bebedream買Combi揹帶要$1288，呢度只賣$1088咋。呢兩個星期的週末係BB Care同一田不停的掃貨。打電話去愛嬰紡（www.famoushill.com.hk)訂埋0／3BabyBB床連床褥，Aprica high chair同Avent奶樽消毒器，係度訂三樣嘢幫我慳咗$1200，平好多，超開心。唔知點解買BB嘢我會師奶仔上身，係咁格價，但我買嘢俾自己又唔會格價喎。所以成日俾Mr T串：格乜價吖！呢度都唔夠你買一對RV啦！

雞蛋仔，媽媽對你唔住，成日買平嘢俾你，不過我覺得只要實用同安全性高就夠啦，唔可以乜都買最貴的。

細佬俾哂姪仔的衫仔同好多濕碎嘢連埋車仔俾我。我乜都唔駛買，淨係呢堆衫仔用品，已經驚著唔哂。之後陸續有來，仲有冬天厚衫仔同靚靚出街衫。細佬話一見到得意的衫，佢就忍唔住會買俾仔仔，買下買下積埋好多。

依家買得八八九九了，好有成功感。

不過最最最煩的係要係屋企安置新工人，要執執間房擺工人床同雜物，頭痛-ing!希望佢九月可到埗同埋個人正正常常啦。Mr T同我的二人世界同自由的生活空間正式進入倒數中，不捨。

不過可以快啲見到雞蛋仔展開依家暫時我仲未幻想到的新生活，其實係幾興奮的。

。。。

雞蛋仔成長記錄。。。

雞蛋仔今日平安地到咗26w5d喇！

之前24w到Dr L處檢查時，照到雞蛋仔的頭仔同大腿骨大咗兩週幾，個肚仔大咗三週幾，24w已經係28wBB的average體重，係大隻B。攪到我唔敢日日食烚蛋，驚佢變太大隻。雞蛋仔，你要健康肥肥白白的出世，千祈唔好早咗出嚟呀！

雞蛋仔成長記錄：

24w6d: 959g (2lb2oz)

我依家重咗10磅（肚圍38＂）

Supplement食Materna同藻油DHA每日一粒

金花生日飯@Tosca

今晚和Miss K慶生，是遲來的生日飯。Miss K選擇了Tosca。於是我渣渣臨訂窗邊枱，不過訂時只能排waiting list。

太好了，今晚俾到窗邊枱。這張處於一角的四人枱非常寛濶，又有靚景，我想Miss K會滿意吧！

新鮮熱辣麵包。

悅口小吃。

小龍蝦。

芝士panna cotta。

牛肉他他。

Miss K的主菜燒牛肉。

常春藤小姐的黑毛豬。

我的sea bass。

利碧嘉小姐的黑松露貝殼粉。

淺嘗兩道甜品。

像處於雲端上的綿花糖petit fours。

愛杯中物的Miss K今晚要了意大利紅酒，我至愛full body的紅酒，只有羡慕的份兒。

言談甚歡，亦分享了各人近況和其他朋友的境況。知道有些朋友婚姻或家庭不如意，有點唏噓。突然覺得很多男人信不過，很恐怖，當然我家的Mr T除外啦。

今日穿衣日誌。。。

雞蛋仔。學習篇(4）

呢個七月每逢星期六下午，Mr T和我都要去上個湊B班，學習如何照顧初生B。

話說我同Mr T講我之後坐月期間我唔掂生水，叫佢跟陪月學下點幫雞蛋仔換片片沖涼涼，係陪月放工後同放假期間我旨意晒佢幫手湊。Mr T一聽到之後，即刻渣渣臨話要去上堂學湊B，懶到爆的我咪話之後有陪月㗎嘛，叫佢教你囉。

不過一向審慎的Mr T認為如果自己唔去上堂，就會唔知陪月嗰套啱唔啱，唔想俾人老點。咁又係。於是拿拿臨俾學費上堂喇。

湊B班共有4堂，由姑娘講解。最鐘意大部份的堂都係講點湊B，而唔係成日講拕B同生產過程，幾實用。一班都有10對couples，好彩唔逼。今堂有教點替準媽媽按摩同實習，姑娘叫老公要日日幫老婆按摩，正！

第一堂有教點抱初生B，原來都有幾種手勢，乜正手，轉身，左手交右手，乜手交乜手，對於我呢個左右不分的人來說，有啲複雜，唯有慢慢學啦。原來Mr T抱B好有天份，佢全部學識啦，返咗屋企仲成日抱住呢隻公仔實習。真係旨意佢就啱啦！

今日去攞訂咗的Combi 4 Way揹帶。Combi有三款4 Way，有隻新出的賣哂，唔知以後會唔會再返貨，另外的比較焗身，終於決定買呢隻透氣的。

呢種揹帶最最重要係可以俾newborn平瞓用，承托力ok，唸住出院和去健康院時短途車程中可以安全地運送雞蛋仔，成日覺得搭的士淨係手抱好牙煙。我又冇車，car seat用唔著。買咗安樂哂。

。。。

依家我最怕未到28w呢個安全島之前早產。我成日蒲BK見到有啲JM話5個月冇咗，因為子宮頸短穿水，事前冇先兆。於是我又災難小姐上身，之前係醫院和Dr L處度過，好彩正常，不過又唔係100%放心。

昨晚去奶奶屋企食飯，唸住雞蛋仔踢踢時俾奶奶摸下，不過竟然成餐飯冇郁過，好擔心。返到屋企都仲係冇郁過，呢一週個肚又有時失驚無神硬咗，有時凸起咗一舊，真係唔知宮縮定雞蛋仔撐咗出嚟，唔識分，勁擔心，唸住好冇半夜去急症室，不過Mr T叫我冷靜，冲個涼先再算。好彩沖涼之後食理生果feel到佢郁返。

星期六打電話去搵Dr L姑娘問下宫縮到點先係唔正常要睇醫生。晏晝Dr L打俾我解釋下，又話依照我字宮頸長度，28w前早產的機會率細過1%，下次檢查會幫我再度多次。叫我唔好擔心咁多，如果唔係成日見佢即係等於成日塞錢俾佢。咁有呢個statistic，我放心少少啦，兩個星期後先返去見佢覆診啦。Dr L真係超好人，會抽時間親自覆返我，又詳細解釋而且耐心安慰我，等我個心定啲。佢收得比其他醫生貴少少真係值得呀。

。。。

今日穿衣日誌