雞蛋仔。愛護篇(3）

回想起過去一年，幸好有Mr T在我身邊扶持我和保護我。

去年做完手術後，Mr T放下了工作，請了兩星期大假在家裡照顧我。完全對煮嘢食雞手鴨腳的他會每天早上煲粥給虛弱的我吃，學會做炒米茶，煲薑水給我洗手沖身，協助我洗頭沖涼，一腳踢所有家頭細務，又要兼顧我的情緒，他自己也有難過的心情呀。

幸好一切挺過來。

有了雞蛋仔後，Mr T對我們保護有加。以前上班，通常我比他早出門。現在他一早起床陪我搭的士上班去，晚上又盡量早些回家陪我。週末放假一定行孖必拖實我，去到人多的地方，他會細心地一隻手攬住我，另一隻手擋著前方，避免途人踫到我。所以如果沒有Mr T的陪伴，論盡的我都盡量避免去人多擠逼的地方，好似冇乜安全感。

讓我很感動的是，Mr T處處以我為先。本質上我倆皆是事業心重的人，但我比Mr T hea一點。因雞蛋仔會在十月尾出世，Mr T已經拒絕了年尾前往英國training，這可是將來更上一層樓的踏腳石啊！其實我有陪月、工人和咁多屋企人，Mr T唔係香港半個月其實冇乜所謂，我叫他放心去training啦，但他說下年去都一樣啫。而且他又推掉了下年首季的一個係美國攪的international conference，我堅持佢一定要去，他說看看當時的情況吧。

雖然我勁癡身和越來越依頼Mr T，但一講到Mr T的工作，我又會立即變得獨立理智，我覺得他的工作比我的有更好的career prospect，而我真心相信他有絕對的能力做好這份工作，隨著年資增加，我覺得他越來越有自信啦。我和雞蛋仔一定會支持他，鼓勵他發展自己的事業。

有Mr T的愛護，我提醒自己亦要尊重Mr T的想法和他的事業心，不能時刻要求他在我身旁團團轉，而要他放心地追求自己的事業和有適當的空間距離。我反思我們的關係，覺得自由、信任和充足溝通絶對是愛情的基礎啊！

我們有愛才會有雞蛋仔，然而在雞蛋仔仍小的時候，我們需要投入多些時間精力照顧他，直到他可以自理，但我心底裏認為以後的重心仍會以Mr T為主，因為只有他才是我這輩子長相廝守的人，我一定一定要努力維繫這段愛情和關顧他。

我寫這篇文就是要未來的自己不要忘記我現在的想法。

雞蛋仔。成長篇(2）

4w-16w

䦕始時冇乜胃口，為咗安胎，每朝早空肚飲一碗田原香滴雞精，因為有的說滴雞精含有天然黃體素。未有雞蛋仔之前，已經飲咗兩個月滴雞精調理身體，感覺不錯。一直冇流血冇啡很穩定，唔知關唔關事。一向有食開葉酸。

晚飯食唔落，淨係食到少少炒粉麵同粥。阿媽叫我一定要日日食蛋飲鮮奶，我又好間中先食。不過雞蛋仔成長又正常，我冇乜特登食特別嘢，除咗每朝飲滴雞精。

12w返醫院照OSCAR和Dr L處做NIFTY，姑娘同Dr L都話雞蛋仔係大隻B，但我又冇重到因為冇胃口又會嘔，所以我成日形住滴雞精肥B唔肥媽。不過之後我飲少咗，一來驚雞蛋仔變超大B，二來穩定咗唔駛靠外來黃體素安胎，因為就算醫生開含黃體素的安胎藥都只係需要食到12w。

仲有一樣嘢超重要，每逢放假，我一定係食同瞓，早餐後瞓一陣，午餐後又瞓晏覺到食晚飯先起身，夜晚十點前又睡魔急call。呢排我瞓時Mr T都陪我瞓，仲懶瞓過我，勁！

16w-21w(依家)

由14w起慢慢開始，害喜感覺逐漸減少，不過係唔會＂叮＂一聲一晚冇哂，只係慢慢冇咁唔舒服。之前出街食飯淨係一個鐘已經攰到想死，冇得去行街街。

16w精神番好多，開始行得食得。我每日食嘅嘢通常包括：

豐富早餐:

（平日）先在家飲高鈣低脂\脫脂奶，食白烚pasteurized雞蛋，奇異果一個，兩粒原粒合桃，返工後再食外賣芝士蛋白治。

（假日）以上及外賣三文治變做自家製牛奶果芝士toast，超好味！

正常午餐：

（平日）BB沙甸魚和熟三文魚三角飯糰 或 斑腩飯 或 外出食點心 或 粉麵。

（假日）好懶，成日淨係去鼎泰豐食小籠包，炒菜和勁好味嘅豬扒䈡花蛋炒飯。

營養晚餐：

（平日）炒菜心\芥蘭\菠菜\西蘭花求其一碟，煎三文魚排\肉餅\煎豆腐事旦一樣，老火滋潤靚湯或節瓜咸蛋滾瘦肉湯或蕃茄薯仔魚湯加兩啖十榖米。飯後一定食蘋果加多樣生果，例如：幾粒紅莓，藍莓，杏桃，至愛車厘子（唔準超過5粒，驚會妊娠糖尿，以前我係成磅成磅攬住嚟食，依家忍得好辛苦）。今個星期起開始間中食杯裝pasteurized乳酪，之前驚生冷。

（假日）因奶奶工人放假，通常和Mr T出去食或自己整蕃茄豆腐烏冬加碟烚菜。再加豐富飯後生果。

維他命：

晚飯後Materna一粒。絕對唔飲媽媽奶。

超為食的我為咗雞蛋仔要堅持介口和禁食涼嘢，好辛苦，個腦成日唸住魚生，壽司，海膽，海鮮，生蠔，龍蝦，蟹，唸到流晒口水。Mr T經常話我真係超超超為食，因為我日日都會唸起好想食某一樣嘢，又唔食得，咁我就會忍唔住大嗌舒發下~~~

除咗每日都食呢啲健康嘢，間中都要食下其他嘢放縱下自己，所以去咗食La Dome de Cristal，Sabatini，St Betty，Al Molo，Angelini，Flint，Nadaman，Lobster Bar，Sevva，嘉麟樓，沙田18。。。依，都食咗幾多好嘢喎，開心番^^

20w照結構時，醫院同Dr L都話雞蛋仔係大隻仔，頭圍同大腿骨係+2w，而肚仔係+3w多，check番以前超聲波records，佢一向係平均缐上大隻B的size，而唔係失驚無神大咗，叫我唔駛擔心，可能Mr T有180cm又大舊，所以雞蛋仔似佢。

雞蛋仔成長記錄：

20w6d: 492g (1lb1oz)

我依家重咗7磅

肚圍(36.5")

。。。

好耐冇抱過我可愛的姪仔啦，依家快10m，好想meet佢臉珠登^3^

。。。

今朝去咗母嬰健康院，醫生安排咗7月尾做我最想做的糖尿測試，我發現至今我在醫院和健康院曾遇到的醫生和姑娘全部非常有禮貌和友善，當然自己首先要對他們有禮啦，開心。

有醫生紙今日又放假啦，中午自己煮咗個蕃茄水餃紫菜雞湯全蛋麵。

雞蛋仔，我們依家一齊去瞓個晏覺囉！Mama love you!

雞蛋仔。回顧篇(1)

失而復得，這感覺非常忐忑，尤其在初段時更加强烈。

這寶貝今次這麼急重回我們的身邊，我知道他一定會癡實我，不會離我而去。剛開始時，每天也過得小心奕奕。最最期待的是6w時回到Dr L的診所，看到當時仲係細細粒的雞蛋仔的閃閃時，內心很激動。

8w至14w時，沒有morning sickness，午餐吃得下，否則連工都返唔到。但黃昏就開始害喜，不時作悶，忍到回家時，就會衝去洗手間嘔，然後攤在梳化上，完全吃不下正常晚飯，連湯也飲不了。每個晚上，奶奶總會打電話問我，問我第二晚想吃什麼粥，炒粉麵，叫工人煮給我吃。每日最怕沖涼洗頭吹頭，真係攰到無力照顧自己，臨瞓前擦牙，又會嘔多次。乜都覺得好臭，包括，飯味，洗頭水，沐浴露，用開的護膚品等。每晚九點幾十點就睡魔急call，一定要去瞓覺。

雖然呢個半月很慢長，但我知雞蛋仔正在努力地生長，我一定要捱過去。之後慢慢冇咗唔舒服的感覺，依家夜晚精神咗，又冇作嘔作悶。當然冇得同之前未有的時候比較，但我已經好感恩。直到現在，從沒有見紅見啡，沒有肚痛，只要雞蛋仔健康，幾辛苦我都一定忍，當然有時會同Mr T呻下啦。

。。。

12w中期考試。去咗醫院照OSCAR和去Dr L處做NIFTY。前一晚太緊張扎醒了幾次。醫院OSCAR結果係low risk。做NIFTY時Dr L會照一次初步的結構照聲波。

審慎的我小心奕奕的問Dr L：望落去係咪似乎正常呀？

Dr L：乜嘢似乎呀？！係完全正常呀！！！

在BK看其他媽媽的NIFTY報告，那三條染色體風險多數係幾千萬份之一，已經很low risk。雞蛋仔的報告竟然係十幾億份之一同好勁嘅六十六億份之一，簡直超low risk。又要讚下雞蛋仔先，你好叻叻呀！

。。。

20w大考。返醫院照結構，由非常有耐性兼好笑容的顧問醫生幫我照，因為他知道我的病歷，我也給了他之前Dr L替我做的多份gene reports。Dr L是他的前上司，是這醫院婦產科的前主管，直至幾年前，Dr L離開醫院在中建大廈開診所私人執業為止。醫生說他同意Dr L的意見，答應我他會細心閱讀這些報告，如有問題，他會致電給我。之後醫生異常小心地替我照結構，共用了45分鐘，問診又用了15分鐘，結果係正常。在公立醫院裡我竟然可享有這超細心的服務，感恩。不過你唔好羨慕我，通常只係嗰啲有奇難雜症兼高危的cases醫院先會咁小心。我情願由一個黑面姑娘求其照十分鐘然後話正常，跟住擲我出房。

心理坦然一點。幾天後去Dr L照結構，沒有那麼緊張。Dr L告訴我那顧問醫生找了他查詢我的報告詳情，Dr L再解釋了一遍，著我放心。我理解政府一般的醫生可能對胎兒遺傳學並不十分了解，我更慶幸一早我已找對了Dr L這專家，雖然他收費非。常。貴，但值得。照完都係話正常，仲show咗雞蛋仔依家的樣子俾我哋睇。O my god，好神奇，真係好似好似Mr T㗎，全家人同常春藤小姐一致話勁似。Mr T當然陰陰笑啦。

都係要讚下雞蛋仔先，你好叻叻呀！記住要健健康康咁出來見我哋，we love you!

我們的雞蛋仔

幾個月冇update個blog，通常都因為有些事情發生。

我發生乜事呢？我要大大聲說：我。有。咗。雞。蛋。仔。啦！

21w。感恩這幾個月一關一關的通過，無驚無險，平平安安。上週在醫院和Dr L處照結構，知道雞蛋仔大考合格，真係超開心。雞蛋仔，你好叻叻呀！

點解叫雞蛋仔？因為我鐘意食雞蛋仔囉，個名好cute。我唸好多香港人都好鐘意食。希望雞蛋仔以後會受好多人歡迎啦！

Dr L俾我睇咗雞蛋仔4D個樣，我想講好似Mr T的側臉囉！我真係好想雞蛋仔似Mr T，咁我可以見到Mr T的mini-me，陪他成長，好像經歷了Mr T的童年一樣，好感動啊！

雞蛋仔，你記住一定一定要健健康康咁出來見我哋，最好帶埋對好似你爹哋的雙眼皮同酒粒仔啦。我哋非常期待你出世呀！We love you！

。。。

照完結構，好開心。在Dr L的診所一次過填哂十張媽媽會申請表，填到手軟。超好人的姑娘留咗好多禮物給我，執咗三大袋超重手的東西，攪到Mr T好似走水貨咁，哈哈。

回家一看，竟然有好多罐奶粉，媽媽用品及媽媽奶。姑娘當我生三胞胎，俾咗好多BB用品我，唔止打孖，仲要三套，有換片墊，衫仔，手襪仔，幾款口水肩，紗巾，薄毛巾，food scissor，spoon等。等我以後買少好多嘢。

這些奶粉，一半係原裝貨size，一半係sample size，但都至少有半罐原裝，奶粉商好重手啊！待我之後做完奶粉research，留下一、兩罐俾雞蛋仔，餘下的連同媽媽奶粉會捐去食物銀行，幫下其他環境冇咁理想的BB同媽媽。將免費的東西放上討論區或網上賣，我不贊同無本生利的行為。

。。。

呢張相望落唔凸，但其實我有大肚子呀。

記錄：

20w。肚36＂。60.4kg（未有時56.8kg, BMI 20）。重咗3.6kg。

。。。

另外，小乖乖今日九歲生日，老豆買咗個生日蛋糕俾乖乖，食到佢lam lam脷呀！希望小乖可以陪多我哋好多年，身體健康。