呢年半我做咗媽媽，其實每步戰戰兢兢，努力想做好媽媽本份。回望返，我係一個懶惰媽媽，最憎換片餵飯清潔善後，淨係鐘意同佢玩，讀故事書俾佢聽。
坐完月要返工的第一日，我極度想返工，一早起身化妝換衫扮靚，着返久違了的高跟鞋，kiss kiss雞蛋仔之後興奮出門，完全冇其他媽媽咁唔捨得BB咁喊哂口。嗰刻，只感覺海闊天空，我絕對應為我係衰阿媽。
當我放假想獨處或者去瞓覺時，我會交雞蛋仔俾保姆或工人，唔理佢一陣。開頭係有少少內疚，但慢慢的，我發現要平衡下自己需要，咁樣我才可以繼續開開心心的。
2016年4月11日 星期一
2015年3月11日 星期三
開刀痴線咁痛架！
話說開刀嗰下好舒服，但原來之後個傷口痛到人都癲。
第一日冇得落床，第二日朝早仲有麻醉藥，瞓係張床度，又完全唔痛喎。之後姑娘叫我落床試下去廁所，起身嗰下，痛到癡咗線，眼水係咁流，咁大個人未試過咁痛！個種痛係身體入面好似所有器官向下墮全部撕裂咁，真係痛到冷汗直冒，差啲暈。天啊！所以第二日落床失敗。
到了第三日，一定要落床，否則下肢血液循環會有問題，所以幾個人扶實我之下，終於落到床，不過醫生要我行去廁所去到VV先叫成功。天啊！幾步之遙，攪咗半粒鐘，未計去VV，呢一個鐘好似一世咁漫長@@中間一路行成個傻婆咁狂喊，嗚。。嗚。。
終於第三日落去餵奶室餵B。咦？唔對路，點解人哋媽媽都係啱啱生完，但行得跳得完全輕鬆到爆炸，而我就好似痛到得返半條人命咁？唉，好樣衰。
不過安慰的是雞蛋仔係育嬰房中最好餵最大食的BB，我記得我支奶係最大支，但佢又好快食完成支奶，第三日已經有雙下巴啦。姑娘話佢哋成日爭住餵我B，因為好易餵又好易掃風。雞蛋仔果然乖乖豬。
2014年12月9日 星期二
22/10/2014仁安生BB紀錄
約咗2014年10月22日朝早8點係仁安開刀。Book咗仁安私家房，package來說私家房不是超貴，只是須付每天的房租，像住酒店的價錢。其實今次生BB最貴係Dr L的醫生費，貴過醫院生仔package。
前一晚入定醫院準備，不須付當晩房租。
私家房在11/F。清靜的房間。
每天餵奶時間。
開完刀第二日，痛到行唔到，第三日先去育嬰室餵奶。雖然私家房可以安排BB去自己房，但我覺得BB係育嬰室俾姑娘照顧最好，所以BB淨係去過我間房一次，其餘時間我就用龜速行去育嬰室探BB。
膳食餐單。
。。。
記低返關於開刀的事先。依家記憶都有少少糢糊。
手術當日，一清早起身洗頭冲涼，之後坐月成個月唔冲得涼，依家緊係冲得乾淨啲。
手術前半個鐘推落手術室。麻醉師係個好溫柔的男人，做乜都會話我知，叫我唔駛緊張。隻手種豆時係有啲痛。打半身麻醉前會先係皮膚表層打咗麻醉先，所以真係打半身麻醉支針時冇乜點痛。之後隻腳暖暖地，冇哂感覺。我個人完全冇震，又唔驚。加上Mr T入咗手術室陪我，當時我係好冷靜的。
我望下個鐘，準時早上八時鐘ready開始拉開布簾準備做手術。我叫咗Dr L做手術時唔好一路話我知佢做緊乜，例如：我開始落刀啦！我𠝹開緊你個肚啦！於是我完全唔知係布簾後的Dr L做緊乜，反而企係我隔離的麻醉師成日話好快啦，好快可以見到BB啦。
Feel到個肚推咗幾下，姑娘嗌：8:18分，之後聽到雞蛋仔的喊聲。嗰刻好感動，Mr T和我立刻紅了眼睛，忍唔住眼濕濕。然後Mr T替BB剪臍帶，姑娘抱雞蛋仔俾我哋一齊影相，錫咗佢臉仔一啖，非常香噴嘖。之後縫針，觀察一陣就推出手術室，Mr T係門口等我。
嗰時覺得原來開刀生仔超級舒服。原來惡夢等緊我。。。
下篇再講。
2014年11月5日 星期三
生日快樂。寶貴禮物
今年的生日有這個可愛的小小人兒陪伴。
原來我肚子𥚃的雞蛋仔樣子是這樣的。
由生產過程到回家湊仔的這段日子，感覺超不真實，很像發了一場夢，但夢醒了雞蛋仔仍在我身旁。
每天就是替雞蛋仔換尿片，餵奶，掃風，哄他入睡，然後自己泵奶，吃和趁機小睡。突然一下子生活變了，覺得有點不適應。幸好很多事情我的工人替我分擔了，又有陪月姨姨照顧我飲食和白天裡照顧雞蛋仔，否則我吃不消，抑鬱都似。我真的不敢想像有些媽媽如何自己坐月。
生完之後開頭有一段日子自我感覺低落，可能坐月期間不能洗頭冲涼，只可抹身，覺得好鬼污糟，仲要初期日日流超勁多汗，啲頭髮日日濕到一餅嘢咁，忍到十二朝陪月姨姨終於用香茅水幫我洗頭了，之後每一星期洗一次頭，冲涼就滿月後才可以用花灑暢快咁洗。
我終於明白點解咁易有產後抑鬱，啲荷爾蒙真系自己控制唔到，有時冇乜嘢，但有時當半夜自己超攰的時候但雞蛋仔仍然跟光光唔瞓或者爆喊時，嗰刻個心真係有唸點解自己要咁辛苦生仔，個肚鬆泡泡，以後我的人生就係咁架啦，做個核突的黃面婆，唉！勁灰又好後悔。唔想理雞蛋仔想由佢自己喊飽就算。尤其當Mr T放完大假開始返工時日日噴埋香水「花枝招展」咁執到靚一靚出門口時，而我自己又未擦牙洗面個頭又臭但餵緊奶時，嗰刻覺得心理好唔平衡，點解要我咁樣衰咁辛苦，好似同出面社會脫咗節，成日反問點解係我困係屋企，點解唔係Mr T去湊仔呢啲白癡問題。依家回想起來，覺得當時的自己好無聊，我放緊產假唔駛返工但逗到成份人工喎，前後三個月唔駛做但unun腳收錢，咁着數嘅嘢，仲唸返工做乜嘢吖！我唸當時嘅我一定係癲咗。
當時好彩一見到雞蛋仔嗰個天真無邪可愛樣，又即刻母愛范濫好鬼肉緊，我唸我應該唔係有好嚴重的depression。呢種心理唔平衡的感覺維持咗幾個星期，好彩之後雞蛋仔和我互相適應咗大家就乜事都冇啦。
之後要寫番幾篇關於開刀生仔同餵人奶先，驚自己唔記得咗。生完仔真係冇乜記性。
（寫於7/12/2014）
2014年10月21日 星期二
第一次遇見。最後一日倒數
明天就可以見到雞蛋仔了。
我還記得第一次見到雞蛋仔時Mr T和我是多麼的感動。當時他只是不足1cm的胚胎，看見他的心臟閃閃跳動，總算鬆了一口氣。當時總覺得時間過得很慢很慢，渡日如年，想快點到三個月穩定下來，快點做Nifty。之後想快點到五個月照結構，然後快點到七個月早產都唔驚，之後又想到八個月肯定私家醫院會收我，終於等到依家38w足月啦，明天就可以見到肚入面的雞蛋仔。你好乖呀！真係留係我個肚度等10月22日見daddy mummy呀！
可能我每天都哦雞蛋仔，敎佢倒數日期。令我有少少直覺認為雞蛋仔出世後會係一個乖乖的小BB，希望真係係啦。
幾日前37w6d最後一次返Dr L處產檢，雞蛋仔重8.3磅，而我整個孕期重咗13磅，希望他不會受我的妊娠糖尿影響，出世後血糖唔會過低，健健康康，肥肥白白啦。
依家有少少緊張，唔係因為即將開刀，而係好奇雞蛋仔個樣係點嘅呢？佢雙眼皮定單眼皮呢？佢似Mr T定似我多啲呢？佢多唔多頭髮呢？第一眼見到自己個仔我會有乜感覺呢？究竟Mr T呢個左yau仔識唔識（有冇勇氣）剪臍帶呢？雞蛋仔係用左手定右手呢？佢會唔會有酒粒而且靚仔過張智霖呢？我真係好無聊，不過又成日唸一大堆呢啲問題。
今晚就會入定醫院作準備，等待明天早上八點開刀。Mr T會陪足我呢五晚，希望佢唔會瞓到周身骨痛啦。
。。。
由37w足月開始，呢個幾星期我狂食清胎毒嘅嘢，例如腐竹蛋，綠豆沙，西瓜，哈蜜瓜，椰青水，涼粉，芝麻糊同杏仁糊咁，希望雞蛋仔臉豬登白白滑滑。上次糖尿入院，姑娘抱咗一個可愛的BB女俾我見下，塊面仔好紅好似有少少疹咁，姑娘話BB媽咪臨生前冇清胎毒，所以BB有胎毒。嘩！原來真係要清架，我以前以為自己一向寒㡳，有咗之後食嘢又清淡，唸住生之前求其食一，兩次芝麻糊就算。依家都係認真啲清胎毒好，今朝morning tea都飲咗碗腐竹蛋糖水，正！
。。。
今日有好多朋友whatapps我祝福我明天順順利利呀，我屋企人又個個打俾我叫我唔駛驚，感動。
Yes!依家一切準備就緒，雞蛋仔，明天見！
2014年10月2日 星期四
兩日一夜入院記。難忘
上星期返威記糖尿覆診，之前有幾餐lunch後血糖超標，醫生原本要我開始打胰島素針，我求下醫生俾多幾日我觀察血糖，跟下營養師俾我的revised diet，唔好打針住，於是醫生捉我係9月30日入院，跟足醫院糖尿餐食，如果血糖冇超標就唔駛我打針。
呢兩日一夜的住院記，好難忘。
辦理入院手續時，我一直以為只有真正分娩的時候才可以住私家房。好彩多口問姑娘可唔可以住私家房，姑娘話程序上要醫生批准，不過都幫我預留定一間私家房先。叫我去大房張床度抖下，醫生批准咗就幫我換房。
大房有幾十個媽媽，有啲同我一樣入院食糖尿餐，有啲正在作動，有啲等催生，不過大家都好靜，儘量不影響鄰床。等咗一陣，可以去9樓的私家房啦。冇哂單人的頭等房，其實二人的二等房都ok，好過冇。
我同房啱啱生完BB一日，夜晚就出院啦，好堅，不過BB未出院住。於是我夜晚一個人一間房，不過瞓得唔好，除咗偶爾有BB喊聲外，亦因為個肚好大，係屋企要好多cushion枕住個肚先瞓到，不過呢度得一個扁dat dat的枕頭，所以好唔舒服。
啲糖尿餐我覺得好油，又多芡汁，我覺得我自已係屋企食開的走油走調味料走芡汁的餸其實清淡過佢多多聲，於是每餐全部食完之後都係走廊行一個鐘，求神拜佛血糖唔好超標呀。
就係呢啲餐：
午餐，菜好油，黃色嘅係葡汁魚柳加件薯仔，個汁好杰=.
晚餐，菜好油，橙色嘅係茄汁魚柳，個汁都係好杰=.=
第二朝的早餐
午餐，菜繼續好油，橙色嘅又係茄汁魚柳，個汁仍然好杰=.=
每餐食完後兩個鐘自己要篤手指同姑娘會同你抽血準確咁檢驗血糖，所以我又要勇敢咁俾姑娘抽咗幾次血。食完午餐終於醫生巡房啦，我可以出院了。
。。。
其實難忘嘅絕對唔係以上嘅事。
而係我可以親眼近距離見到幾個啱啱出世的初生BB。私家房樓層有個育嬰室，我第一次咁近見到啱啱出世一個鐘都唔夠嘅小BB冲涼，個頭仲有血，個身仲有白色的胎膜，喊得好大聲，手仔腳仔勁郁，護士俾我睇住BB冲涼，內心有少許激動，雖然係人哋的BB，但我幻想之後雞蛋仔一出世都係咁樣，突然覺得好amazing，我肚內的BB真係就快出世啦，我可以以後抱住我個仔，攬實佢。真係好想好想快啲到開刀嗰日，咀啖佢。
姑娘知雞蛋仔上星期34w已經有6.6磅，佢特登抱咗個啱啱出世而且有6.6磅的BB女俾我睇下，俾我知肚內的雞蛋仔實際有幾大。其實6.6磅真係幾大，唔怪得我個肚好似藍球啦！
之後有位啱啱催生完的媽媽和我同一間房，巧合地剛洗完白白的可愛BB就係佢個仔。這位勇敢的媽媽痛咗好多個鐘先誕下BB，虛弱嘅佢係咁話超級超級超級痛，終於知道乜嘢係十級痛，我對佢講你真係超勇敢！
。。。
今次入院仲做埋兩件事。依家中大醫學院婦產科做緊一個有關Fragile X Mutation的研究，目的係透過發展一個創新的檢測方法去有效地篩選出帶有Fragile X呢個mutation gene的攜帶者。Fragile X sydrome係除了Down sydrome之外最常見引致遺傳性智力障礙的原因。一個Fragile X carrier生下的小朋友未必每個都一定有智力問題，但胎兒透過遺傳而智力有障礙的風險卻增加，尤其是男嬰。所以我二話不說立即答應參與呢個研究，只須抽少少血，一來非常有意義，二來又不用自費去私家驗。如果我不是carrier，醫學院不會聯絡我。
第二件事是出院前順便做埋B鏈檢查，不用下星期請假撲去醫院做檢查。真係好方便。
今次入院，無論大房或私家房，我遇到的每個姑娘和抽血姐姐都好好人，幾關心媽媽，而且又會同你傾下計，好nice架。所以呢兩日一夜威記之旅感覺都幾好，而成日可望住初生BB又令人好感動難忘。
。。。
雞蛋仔成長記錄：
35w6d: 3428g (7lb9oz)
我又輕咗一磅幾，依家只共重咗11磅（肚圍41＂）
2014年9月28日 星期日
一屋三人的生活
印尼幫工到達我家已半個月，這一屋三人的生活（下個月加埋雞蛋仔就是四個人了），暫時我想説。真。的。爽。死。了！
我呢個懶人，依家乜都唔駛做，非常啱我。只有一點點後悔，就是當初點解唔早啲請工人。不過早啲請，我未必會遇到這工人。
其實請工人過程唔係冇波折的。一早我已拿拿臨去agent處請工人，因為怕難請人照顧new born。很快就見了一個快完約的三十多歲本地工人，在香港工作了快六年。見完冇乜特別好感或反感，反而係佢話要考慮，之後我其實覺得佢好多嘢講，於是banned。
我理想中的幫工是比較文靜，當我在家時她不會騷擾我，讓我不太感到她的存在。
第二個工人是身處印尼的年輕海外幫工，只在網上看了她和agent的面試片段，就決定請她了。可惜印尼驗身報告話佢個肺花咗，怕有肺癆，agent建議我另找另一個。
因餘下時間不多，立即看看其他海外幫工的CV。沒有一個合眼緣的，除了這一個工人，她的CV剛剛給agent。二十六歲，單身，在首都耶加達工作了六年，然後去了新加坡做了兩年，有八年照顧幼兒經驗，願意照顧new born。我只看了她的照片，就好勇咁決定請她了。和她通了一通長途電話，發現她英文不錯，起碼明白我九成對話，溝通得到，立即叫agent安排簽証等事項。
我記得工人到我家前一晩，我的心情好鬼lor lor luen。又怕屋企多咗個人會好唔慣，又怕佢係BK啲jm所講嘅公主，麻麻煩煩。不過好彩佢到咗之後似乎好正常，又聽話，我先放心。
暫時這幫工很幫得手，學得好快，態度好好，仲好乾淨，好似對細路仔愛心爆棚咁，暫時我未嘔過血。有時我返工就叫佢去我奶奶家跟她印尼幫工學去街市買餸同煮廣東菜。依家我放心叫佢去街市同super market買嘢同煮成餐飯啦。仲有非常重要的全屋清潔工作暫時佢做得幾妥貼，因為我那位非常好的鐘點姐姐敎哂佢，非常攪笑哋一個唔識英文一個唔識廣東話竟然溝通到，仲要有傾有講會大笑架喎^.^
依家最爽其實係Mr T，因為佢真係乜都唔駛做，飯來張口呀！
希望工人繼續醒醒目目，正正常常。雞蛋仔出世後希望佢會幫手湊得好好啦！
訂閱：
文章 (Atom)